Maxfiylik siyosati
Yangilangan: 15-noyabr, 2026
OvozAI nutqni matnga va matnni nutqqa aylantiradi. Undan Telegram botimizda, uning mini ilovasida, app.ovozai.uz saytida, OvozAI mobil ilovasida va dasturchilar uchun API orqali foydalanish mumkin. Bu yerda qanday ma'lumotlarni yig'ishimiz, nima uchun, qancha saqlashimiz va siz nima qila olishingiz tushuntirilgan.
1. Nimalarni yig'amiz
- Hisob ma'lumotlari. Telegram foydalanuvchi ID'ingiz, ismingiz, username va tilingiz. Saytga Google orqali kirsangiz — ismingiz, elektron pochta manzilingiz va profil rasmingiz. Telegram orqali — Telegram ID'ingiz, ismingiz, username va rasmingiz. iPhone'dagi mobil ilovada Apple orqali ham kirish mumkin: Apple'dan identifikator, siz ko'rsatishga rozi bo'lgan elektron pochta manzili (bu Apple xatlarni yo'naltirib beradigan manzil bo'lishi mumkin) va birinchi kirishda ismingizni olamiz. Saytda Telegramni ulasangiz, saytdagi va botdagi hisoblaringiz bitta bo'ladi.
- Qayta ishlash uchun yuboradiganlaringiz. Ovozli xabarlar, audio va video fayllar, YouTube videolariga havolalar, ovozga aylantirish uchun matn va jonli transkripsiya paytida mikrofondan kelgan ovoz. Bot qo'shilgan Telegram guruhi yoki kanalida — u yerga yuborilgan yoki joylangan yozuvlar, jumladan botni ishga tushirmaganlarniki ham.
- Siz uchun tayyorlaganlarimiz. Matnlar, ulardan tuzilgan konspekt va vazifalar, tarjimalar, subtitrlar hamda yaratilgan nutq.
- Foydalanish va to'lovlar. OvozAI'dan qachon foydalanganingiz, yozuvlaringiz uzunligi, qancha vaqtingiz qolgani, nima sotib olganingiz, qaysi usulda va qanchaga. Karta ma'lumotlari to'lov provayderida kiritiladi: biz ularni ko'rmaymiz va saqlamaymiz. Mobil ilovada olingan obuna uchun to'lovni Apple yoki Google oladi; u haqida tarifni, do'konni, joriy davr qachon boshlanib, qachon tugashini, obuna yangilanish-yangilanmasligini va uning to'lovi o'tmay qolgan-qolmaganini hamda har bir to'lov yozuvini (summasi va do'kondagi tranzaksiya raqami) saqlaymiz.
- Bizga yozganlaringiz. Fikr-mulohazalaringiz, ularga javoblarimiz va so'rovnoma javoblaringiz.
- Texnik ma'lumotlar. Saytda — kirganingizni eslab qoladigan cookie va brauzeringizda saqlanadigan til kabi sozlamalar. Serverlarimiz xavfsizlik va nosozliklarni topish uchun so'rovlarni, jumladan IP manzillarni qisqa muddat qayd etadi. Reklama va analitika cookie'laridan foydalanmaymiz. ovozai.uz va saytda tashriflarni hamda ro'yxatdan o'tish, to'lov kabi qadamlarni Google Analytics bilan sanaymiz; u brauzeringizda hech narsa saqlamaydigan qilib sozlangan. Ro'yxatdan o'tganingizda bizni qayerdan topganingizni (ovozai.uz sahifasi yoki sizni yuborgan sayt, masalan qidiruv tizimi) hisobingiz bilan qayd etamiz; shu paytgacha sayt buni brauzeringizda saqlab turadi.
2. Ulardan qanday foydalanamiz
- Yuborganlaringizni matnga aylantirish, tarjima qilish va ovozlashtirish hamda natijani sizga yetkazish uchun.
- Bepul va sotib olingan vaqtingizni hamda tarifingiz soatlarini hisoblash va to'lovlarni qabul qilish uchun.
- Xabarlaringizga javob berish va muammolarni tuzatish uchun. Javoblarimiz bot bilan chatingizga va ilovadagi «Bizga yozing» bo'limiga keladi; chatda sizga yetib bora olmasak, Google orqali kiradigan pochtangizga yuboramiz.
- Saytda boshlagan matnga o'girishingiz sahifadan chiqib ketganingizdan keyin tayyor bo'lsa, xabar berish uchun: uni bot bilan chatingizga yuboramiz, Telegram bo'lmasa — unga havolani pochtangizga.
- Botda hisobingiz haqida xabar yuborish uchun: bepul vaqtingiz qaytgani, sizni kutayotgan yozuvlar, takliflar. Botni bloklasangiz, ular to'xtaydi.
- Nutqni tanib olish va nutq sintezini yaxshilash, jumladan o'z modellarimizni o'qitish va sinash uchun — biz saqlaydigan yozuvlar, ularning matnlari va ovozga aylantirish uchun yuborilgan matnlar bilan (keyingi bo'limga qarang). O'zimiz o'qitgan modellarni e'lon qilishimiz mumkin, lekin yozuvlar va matnlarning o'zini hech qachon e'lon qilmaymiz.
Ma'lumotlaringizdan reklama uchun foydalanmaymiz.
3. Yozuvlar va matnlar
Botda odatda qisqa yozuvlarni saqlamaymiz. Botga shaxsiy chatda yuborgan 20 daqiqagacha va 50 MB gacha yozuvingiz qayta ishlangach serverlarimizdan o'chiriladi, matni esa sizga yuboriladi va saqlanmaydi. Matn ostidagi tugmalar (tarjima, subtitrlar) ishlashi uchun uni 24 soatgacha xotirada ushlab turamiz. Subtitrlar uchun tayyorlangan fayllar ish tugagach, eng kechi bir kun ichida o'chiriladi.
Sayt va mobil ilova. Saytda yoki OvozAI mobil ilovasida matnga o'girgan yozuvlaringiz sozlamalaringizdan qat'i nazar matni bilan saqlanadi (mobil ilovada bunday sozlama yo'q): ularning ovozini (videoda — tasvirsiz) tarixda tinglash mumkin, biz esa undan nutqni tanib olishni yaxshilash, jumladan o'z modellarimizni o'qitish va sinash uchun foydalanamiz. Ikkalasi ham siz matnni tarixdan yoki hisobingizni o'chirmaguningizcha saqlanadi: ikkala holda ham yozuv o'chiriladi. Video uchun subtitr so'rasangiz, subtitrlarni videoga joylay olishingiz uchun videoning o'zini, tasviri bilan, bir kun saqlaymiz; keyin u undan tayyorlangan videolar bilan birga o'chiriladi.
Matnni ovozga aylantirish. Botda, ilovada, saytda va kanallarda ovozga aylantirish uchun yuborgan matningizni to'liq va undan yaratilgan audioni tarixdan qayta tinglash va yuborishingiz uchun saqlaymiz. Ulardan nutqni tanib olish va nutq sintezini yaxshilash, jumladan o'z modellarimizni o'qitish va sinash uchun ham foydalanamiz. Ular hisobingizni o'chirmaguningizcha saqlanadi.
Yozuvlarni saqlashga ruxsat bersangiz. Bu sozlama yoqilganda (u har oy qo'shimcha bepul daqiqa beradi) botga yuborgan yozuvlaringizni va ularning matnlarini saqlaymiz hamda nutqni tanib olishni yaxshilash, jumladan o'z modellarimizni o'qitish va sinash uchun ishlatamiz. Uni istalgan vaqtda botdagi /privacy buyrug'i yoki ilova sozlamalari orqali o'chirishingiz mumkin; shundan keyin 20 daqiqagacha va 50 MB gacha bo'lgan yangi yozuvlar saqlanmaydi. Undan oldin saqlangan yozuvlar hisobingizni o'chirmaguningizcha ma'lumotlar to'plamimizda qoladi.
Botdagi uzun yozuvlar. 20 daqiqadan uzun yoki 50 MB dan katta har bir yozuvni sozlamalaringizdan qat'i nazar matni bilan saqlaymiz; birinchi marta bot sizga bu haqda aytadi. Saqlangan yozuvlarga yuqoridagidek munosabatda bo'linadi.
YouTube havolalari. Videoni yuklab olmaymiz: Google'ning sun'iy intellekt xizmati uni biz uchun YouTube'dan o'qiydi. Matnni video havolasi bilan birga saqlaymiz — botda, saytda va API orqali.
Jonli transkripsiya. Matnni va mikrofondan kelgan ovozni saqlaymiz, shunda ularni yoki hisobingizni o'chirmaguningizcha tarixda o'qib, tinglay olasiz. Telegram'da matn chatingizga ham yuboriladi. Ovozdan sozlamalaringizdan qat'i nazar nutqni tanib olishni yaxshilash, jumladan o'z modellarimizni o'qitish va sinash uchun ham foydalanamiz.
Dasturchilar uchun API. API orqali yuborilgan yozuvlar qayta ishlangach darhol o'chiriladi va sozlamalaringizdan qat'i nazar hech qachon saqlanmaydi va tanib olishni yaxshilash uchun ishlatilmaydi. Ularning matnlari va vaqt belgilari olib ketishingiz uchun 7 kun saqlanadi, so'ng o'chiriladi; YouTube havolalarining matnlarini esa havolasi bilan, siz o'chirmaguningizcha saqlaymiz. Ovozlashtirish uchun yuborilgan matn ham, undan yaratilgan audio ham saqlanmaydi. API so'rovlaringiz jurnalini saqlaymiz, u API sahifasida ko'rinadi: so'rov nima bo'lgani, uzunligi, narxi va xato sababi, lekin uning mazmuni emas. API orqali boshqa odamlarning yozuvlarini yuborsangiz, ularning roziligini olish sizning zimmangizda.
Guruhlar. Guruhda bot a'zolar yuborgan yozuvlarni matnga aylantiradi. Guruhlarda yuborilgan yozuvlarni va ularning matnlarini kim yuborganidan qat'i nazar, jumladan botni ishga tushirmaganlar yuborganlarini ham saqlaymiz hamda nutqni tanib olishni yaxshilash, jumladan o'z modellarimizni o'qitish va sinash uchun ishlatamiz. OvozAI hisobi bor odam yuborgan yozuv o'sha hisob bilan birga o'chiriladi; boshqalar o'z yozuvlarini o'chirishni info@ovozai.uz manziliga yozib so'rashi mumkin. Har kimga guruhlar uchun oylik vaqt berish uchun har bir yuboruvchi guruhlarga yuborgan yozuvlar uzunligini Telegram hisobi (yoki kanal) bo'yicha hisoblaymiz, botni ishga tushirmaganlarda ham; hisob har oy yangidan boshlanadi.
Kanallar. Botni Telegram kanalingizga qo'shsangiz, u yerda joylangan ovozli xabarlar va videolarni matnga aylantiradi va matnini sozlaganingizdek post ostiga, izohlarga yoki alohida postga qo'yadi; ovoz yoqilgan bo'lsa, matnli postlarni ham ovozga aylantiradi. U yerda joylangan yozuvlarni matni bilan, obunachilar matnni postdan to'liq ochishi uchun, hisobingizni o'chirmaguningizcha saqlaymiz hamda nutqni tanib olishni yaxshilash, jumladan o'z modellarimizni o'qitish va sinash uchun ishlatamiz. Kanalni ulagan adminning vaqti sarflanadi.
4. Biz uchun ma'lumotlarni qayta ishlaydigan xizmatlar
- Google Cloud. Uning sun'iy intellekt modellari (Vertex AI) matnga aylantiradi, tarjima qiladi va ovozlashtiradi; uning ombori va serverlari biz uchun fayllarni saqlaydi va qayta ishlaydi. Google bu ma'lumotlarni bizning topshirig'imiz bilan qayta ishlaydi va bulut shartlariga ko'ra ulardan o'z modellarini o'qitishda foydalanmaydi.
- Telegram siz bilan bot o'rtasida xabar va fayllarni yetkazadi va chatingizni o'z maxfiylik siyosatiga ko'ra saqlaydi.
- To'lov provayderlari: Click (O'zbekiston kartalari), Polar (xorijiy kartalar) va Telegram Stars. Har biri to'lovingizni o'z maxfiylik siyosatiga ko'ra qayta ishlaydi.
- App Store va Google Play. Mobil ilovada olingan obuna uchun to'lovni Apple yoki Google o'sha yerdagi hisobingizga bog'langan to'lov usuli orqali oladi. Karta va to'lov ma'lumotlaringizni biz ko'rmaymiz. Har biri xaridni o'z maxfiylik siyosatiga ko'ra qayta ishlaydi.
- RevenueCat (RevenueCat, Inc., AQSh) biz uchun ilovalar do'konlaridagi obunalar hisobini yuritadi. Mobil ilovada tariflarni ochganingizda yoki obuna bo'lganingizda u OvozAI'dagi hisobingiz raqamini (ismingiz, elektron pochta manzilingiz yoki Telegram ID'ingizni emas), do'kondan xarid ma'lumotlarini (tarif, uning sanalari va narxi, do'kon mamlakati, obuna yangilanadimi, bekor qilinganmi yoki puli qaytarilganmi) hamda ilova va telefon haqidagi texnik ma'lumotlarni (ularning versiyalari, telefon modeli va tili, IP manzilingiz, iPhone'da esa Apple ilovaga shu telefonda beradigan identifikator) oladi. U bizga hisobingizda qaysi tarif borligini bildiradi va bu ma'lumotlarni o'z maxfiylik siyosatiga ko'ra qayta ishlaydi.
- Xosting. Serverlarimizni xosting provayderi yuritadi.
- Resend xatlarimizni yuboradi: xabarlaringizga javoblar va tayyor matnlarga havolalar.
Ma'lumotlaringiz mamlakatingizdan tashqarida qayta ishlanishi mumkin. Ma'lumotlarni davlat organlariga faqat qonun talab qilganda beramiz.
5. Google hisobi ma'lumotlari
Google orqali kirsangiz, ismingiz, elektron pochta manzilingiz va profil rasmingizni olamiz. Ulardan faqat hisob yaratish, tizimga kiritish, qaysi hisobdan foydalanayotganingizni ko'rsatish xabarlaringizga javoblarimizni va sahifadan chiqib ketganingizdan keyin tayyor bo'lgan matnlarga havolalarni pochtangizga yuborish uchun foydalanamiz. Ularni sotmaymiz, boshqalarga bermaymiz va reklama uchun ishlatmaymiz.
OvozAI'ning Google API orqali olingan ma'lumotlardan foydalanishi va ularni uzatishi Google API xizmatlari foydalanuvchi ma'lumotlari siyosatiga, jumladan cheklangan foydalanish (Limited Use) talablariga mos keladi.
6. Qancha saqlaymiz
- Hisob ma'lumotlari va balans — hisob mavjud ekan; hisob o'chirilgach — faqat 7-bo'limda yozilganlar.
- To'lov yozuvlari, jumladan ilovalar do'konidagi obuna yozuvi — qonun talab qilgancha.
- Saytdagi va jonli matnlar yozuvlari bilan — ularni yoki hisobni o'chirmaguningizcha.
- Mobil ilova yordamchisi bilan suhbat («So'rash») — yangi suhbat boshlamaguningizcha yoki hisobni o'chirmaguningizcha.
- Dasturchilar uchun API natijalari — 7 kun.
- API so'rovlari jurnali — hisob mavjud ekan.
- Yaratilgan nutq va uning matni — hisob mavjud ekan.
- Bizga yozganlaringiz va javoblarimiz — hisob mavjud ekan.
- YouTube havolalari matnlari — hisob mavjud ekan.
- Botdan, guruhlardan va kanallardan saqlangan yozuvlar — 3-bo'limda yozilganidek.
- Server jurnallari — qisqa muddat.
7. Sizning imkoniyatlaringiz
- Balans, tarix va sozlamalarni ilovada ko'ring.
- Saytdagi, mobil ilovadagi va jonli matnlarni yozuvlari bilan tarixdan istalgan vaqtda o'chiring.
- Botga yuborgan qisqa yozuvlaringizni saqlashni botdagi /privacy yoki ilova sozlamalari orqali o'chiring. Uzun yozuvlar, guruh va kanallardagi yozuvlar, ovozga aylantirilgan matnlar hamda saytda, mobil ilovada yoki jonli matnga o'girilgan yozuvlar bu sozlamadan qat'i nazar saqlanadi.
- Hisobingizni mobil ilova sozlamalarida («Hisobni o'chirish») yoki ilovasiz, bizga yozib o'chiring: hisobni qanday o'chirish sahifasiga qarang. Shunda yozuvlaringiz va matnlaringiz konspekt va vazifalari bilan, yaratilgan nutq, bizga yozgan xabarlaringiz, kirish ma'lumotlaringiz, shuningdek sotib olingan vaqt va API kreditlari so'rov tekshirilgach, 7 kun ichida o'chiriladi. App Store yoki Google Play'da olingan obuna bu bilan bekor bo'lmaydi: uni o'sha yerda bekor qiling. To'lov yozuvlari, ilovalar do'konidagi obuna yozuvi bilan birga, va mazmunsiz foydalanish yozuvlari (nimadan, qachon va qancha foydalanganingiz) qoladi. Hisobni o'chirib, qayta ro'yxatdan o'tib bepul vaqtni qayta olib bo'lmasligi uchun shu oy qancha foydalanganingiz, olingan bepul sinovlar va taklif mukofotlari hamda hisob to'xtatib qo'yilgani ham saqlanadi. Bular Telegram ID, elektron pochta yoki boshqa identifikatorlaringizning o'ziga emas, kirish usullaringizdan yasalgan bir tomonlama kodga bog'lanadi: xuddi o'sha Telegram, Google yoki Apple hisobi bilan qayta kirsangiz, ular davom etadi.
- Ma'lumotlaringiz nusxasini yoki ularni tuzatishni, ilovada qila olmasangiz, hisobingizni o'chirishni ham so'rang: info@ovozai.uz manziliga yoki ilovadagi «Bizga yozing» orqali yozing. 30 kun ichida javob beramiz.
- Bizdan xabar olmaslik uchun botni bloklang.
8. Xavfsizlik
Ma'lumotlar shifrlangan ulanishlar orqali uzatiladi, kirish cheklangan serverlar va bulut omborida saqlanadi; ularga faqat xizmatni yurituvchilar kira oladi. Mutlaqo xavfsiz tizim bo'lmaydi: agar ma'lumotlaringiz sizib chiqsa, sizga xabar beramiz.
9. Bolalar
OvozAI 13 yoshgacha bo'lgan bolalar uchun mo'ljallanmagan. Agar bola bizga o'z ma'lumotlarini bergan deb hisoblasangiz, bizga yozing — ularni o'chiramiz.
10. O'zgarishlar
O'zgarishlarni shu yerda yangi sana bilan e'lon qilamiz. Muhim o'zgarish bo'lsa, botda yoki saytda ham xabar beramiz.
11. Aloqa
Pochta: info@ovozai.uz, ilovadagi «Bizga yozing» yoki botdagi /feedback buyrug'i.